"Ümid” Sosial İnkişafa Dəstək İctimai Birliyi ABŞ Beynəlxalq İnkişaf Agentliyinin Azərbaycandakı missiyası (USAID) tərəfindən maliyyələşdirilən Şəffaflıq Naminə Vətəndaş Cəmiyyəti (ECSOFT) proqramı çərçivəsində 2 mart 2022-ci il tarixindən "Vətəndaş cəmiyyəti institutlarının ictimai həyatda rolunun daha da gücləndirilməsi vasitəsilə açıqlıq, şəffaflıq və hesabatlılıq prinsiplərinin tətbiqinin genişləndirilməsi" layihəsinin icrasına başlamışdır. Bütün maraqlı tərəflərlə, o cümlədən Bələdiyyələr, İcma Əsaslı Təşkilatlar (İƏT), QHT-lər, "Açıq Hökumətin Təşviqinə dair Hökumət-Vətəndaş Cəmiyyəti Dialoqu Platforması”, mərkəzi və yerli icra hakimiyyəti orqanları ilə sıx əməkdaşlığın qurulması bu layihənin müvəffəqiyyət qazanmasında əsas amillərdən biri olmuşdur.
Layihə çərçivəsində əməkdaşlıq edilən təşkilatlardan biri də Talabıqışlaq İƏT-dır. Talabıqışlaq Bələdiyyəsi Quba rayonu ərazisində fəaliyyət göstərir. Bələdiyyəyə 6 kənd (Küçeyi, Xaroşa, Cağacıq, Talabı, Töhmər və Talabıqışlaq) daxildir. Əhalinin ümumi sayı 5390 nəfərdir (onlardan 2640 nəfər kişi, 2750 nəfər qadın, 692 nəfər gənc). Ərazisi 4000 ha-dır. Bələdiyyə ərazisində heç bir ödəmə terminalı yoxdur. Əlacsız qalan kənd sakinləri kommunal, bank, sığorta xidmətləri, dövlət ödənişləri, internet, kabel televiziyası və digər ödənişləri həyata keçirə bilmək üçün hər dəfəsində rayon mərkəzinə yol qət etməli olurlar. Bu da, öz növbəsində onların nəqliyyat xərclərinin artmasına, zaman itkisinə, fiziki yorğunluğuna səbəb olur. Kənd əhalisinin rahatlığının təmin edilməsi, xərclərinin müəyyən qədər azaldılması məqsədilə sözügedən layihə çərçivəsində verilmiş məsləhətlər nəticəsində bu icmanın Bələdiyyəsi tərəfindən MilliÖn ödəmə terminalının quraşdırılması üçün aidiyyəti quruma rəsmi müraciət edilmişdir. Həmin qurum Bələdiyyənin müraciətinə müsbət cavab vermiş, ödəmə terminalının quraşdırılacağı sahibkarlıq obyektinin sahibi Emin İdrisovla əməkdaşlığa başlamışdır. Bu əməkdaşlığın müsbət nəticələnməsi sayəsində kənd sakinləri kommunal, mobil, bank və digər ödənişlərini asan və ən qısa müddətdə həyata keçirə biləcək və onların rahatlığı təmin edilmiş olacaqdır.