Son illər Azərbaycanda "Açıq Hökumət Tərəfdaşlığının (AHT) meyarlarının, o cümlədən şəffaflığın, hesabatlılığın, vətəndaş iştirakçılığının, dürüstlüyün gücləndirilməsi istiqamətində xeyli işlər görülsə də, regionlarda bu barədə məlumatlılıq yetərli səviyyədə deyildi. Xüsusilə, dağlıq ərazilərdəki icma üzvləri hökumətin həyata keçirdiyi fəaliyyətlər barədə məlumatların əldə edilməsində çətinlik çəkirdilər. Bu çətinlikləri Quba-Xaçmaz regionunda 4 rayonun (Quba, Qusar, Xaçmaz, Şabran) 12 icmasında araşdıran "Ümid” Sosial İnkişafa Dəstək İctimai Birliyi yuxarıda qeyd edilən problemlərin həllinə töhfə vermək məqsədi ilə ABŞ Beynəlxalq İnkişaf Agentliyinin Azərbaycandakı missiyası (USAID) tərəfindən maliyyələşdirilən Şəffaflıq Naminə Vətəndaş Cəmiyyəti (ECSOFT) proqramı çərçivəsində 2 mart 2022-ci il tarixindən "Vətəndaş cəmiyyəti institutlarının ictimai həyatda rolunun daha da gücləndirilməsi vasitəsilə açıqlıq, şəffaflıq və hesabatlılıq prinsiplərinin tətbiqinin genişləndirilməsi" layihəsinin icrasına başlayaraq uğurlu nəticələr əldə etmişdir. Layihə çərçivəsində 12 hədəf icmada facebook səhifələri, 2 Bələdiyyə üçün twitter səhifəsi və 3 icma üçün whatsApp qrupları yaradılmışdır. Bununla da, icma və Bələdiyyələr öz fəaliyyətləri ilə bağlı məlumatları icma üzvlərinə daha dəqiq və daha əlçatan yollarla çatdırılması imkanları qazandılar. Artıq Bələdiyyələr (misal olaraq, Quba r-nu Talabıqışlaq Bələdiyyəsi) facebook səhifələrini idarə etməyə, hətta öz fəaliyyətləri barədə yarımillik hesabatlarını (https://www.facebook.com/Talab%C4%B1q%C4%B1%C5%9FlaqB%C9%99l%C9%99diyy%C9%99si-Talabigishlag-Municipality-107756055249340) paylaşmağa başlamışlar.
Həmçinin, hədəf kənd sakinlərinin kəndə təbii qazın çəkilməsi, yol-abadlıq işlərinə, əhalinin içməli su ilə təminatına, elektrik xətlərinin təmirinə, yeni transformatorun alınmasına, yeni məktəb tikintisinə, çay üzərində körpülərin salınmasına, avtomobil yolunun əsaslı şəkildə yenidən qurulması və asfaltlaşdırılması işinə və s. köməklik göstərilməsi barədə təkliflərini facebook səhifəsi vasitəsilə aidiyyəti şəxslərə çatdırmaq imkanları yaranmışdır. Bu kimi addımlar, öz növbəsində rayon ictimaiyyətində böyük ruh yüksəkliyi yaradır.