90-cı illərin əvvəllərində Qarabağ müharibəsi ilə əlaqədar yüz minlərlə insan ev-eşiyini tərk edəndə Günelin ailəsinin yaşadığı Kəlbəcər rayonunun Şaplar kəndi də viran qalır, sahib olduqları ev, bağ, bostan, mal-qara, bir sözlə bütün əmlakları əllərindən çıxır. Ailə 1993-cü ildə beynəlxalq ictimaiyyətin dəstəyi ilə yerli hakimiyyət orqanları tərəfindən Yevlax rayonunda salınmış "EKO” (Fin tipli evlər) köçkün düşərgəsində müvəqqəti sığınacaqla təmin olunur.
"Saç ustası olmaq üçün peşə məktəbinə yazılacaqdım, amma Yevlax şəhərinə gedib-gəlməyin çətinliyinə görə alınmadı”, deyə o əlavə edir.
Günel 18 yaşında ailə qurur və bir neçə il ərzində iki qız övladı dünyaya gəlir. 2010-cu ildə düşərgənin Yevlax şəhərinin yeni salınmış 32-ci Məhəllə qəsəbəsinə köçürülməsi ilə Günelin ailəsinin də həyatı dəyişir.
Yeni məkanda Günel yeni həvəslə qəsəbədəki tanışlarına gözəllik xidmətləri göstərməyə başlayır. Lakin, bütün səylərinə baxmayaraq, peşə yeniliklərini bilmədiyi və ev şəraitində xidmət göstərdiyi üçün Günelin müştəriləri salon xidmətlərinə üstünlük verirlər.
Bu müddət ərzində Günelin ailəsi faciə ilə üzləşir, həyat yoldaşı dünyasını dəyişir. Heç bir əlavə gəliri olmayan və yalnız məcburi köçkün ailələrinin ala biləcəyi kiçik müavinətlərlə Günel ailə qayğılarını təkbaşına çəkməli olur. O, qəsəbədə QHT-lərin təşkil etdiyi 6 aylıq saç ustalığı kursunu başlamış olsa da, həmin dövrdə üzləşdiyi çətinliklər onu həmin kursu yarımçıq qoymağa məcbur edir.
2023-cü ilin ilk aylarında Günelin yaşadığı qəsəbədə "Məcburi köçkün icmalarının səfərbərliyi və bacarıqlarının artırılması” layihəsinin başlaması ilə hər şey dəyişməyə başlayır. Qəsəbəyə peşə kursu təşkil edən təşkilatın gəlməsi xəbərini alan Günel dərhal ərizə ilə müraciət edir. Birləşmiş Millətlər Təşkilatının Qaçqınlar üzrə Ali Komissarlığının (BMT QAK-ın, yaxud BMT-nin Qaçqın Agentliyinin) maliyyələşdirdiyi həmin layihəni "Ümid” Sosial İnkişafa Dəstək İctimai Birliyi həyata keçirir.
Günel müraciət etmiş yüzlərlə ərizəçinin arasından peşəyə olan həvəsinə, bacarığına və təcrübəsinə görə komissiya tərəfindən qadın saç ustası peşəsi sahəsi üzrə iki aylıq təkmilləşmə kursuna qəbul olunmaq üçün seçilir, nəzəri və praktiki kursda iştirak etməklə yanaşı layihə çərçivəsində təşkil olunan "Biznes Planın Hazırlanması” və "Sahibkarlığa Giriş” təlimlərini uğurla başa vurur.
Günel bilik və bacarıqlarını eyni zamanda üzv olduğu İcma İnkişaf Şurasının dəyirmi masalarında və təlim sessiyalarında fəal iştirak etməklə daha da inkişaf etdirir.
"Bütün həyatım boyu bu peşəyə yiyələnmək üçün bacarıqlar əldə etmək üçün imkanlar axtarmışam. Bu layihədə mən o fürsəti əldə etdim və arzularımı reallaşdırmağa başladım”, - deyə Günel bildirib.
Bacarıqları artdıqca və təlim kursları ona özünə inam və ümid bəxş etdikcə, Günel müstəqil biznes qurmaq, xanımlar üçün gözəllik salonu açmaq əzmini daha da möhkəmlədir. Əvvəllər bu istəyini təkbaşına həyata keçirməyi o heç ağlından belə keçirməmişdi. O, ciddi cəhdlə yeni gözəllik salonu açmaq üçün yer axtarmağa başlayır və avadanlıq almaq və iş sahəsi kirayə etmək məqsədi ilə bankdan kredit götürür.
Usta yaninda şagird hazırlığı kursunu uğurla başa vuran Günel icarəyə götürdüyü qadın gözəllik salonunu xəyalında qurduğu şəkildə tam işlək vəziyyətə gətirir. Əlavə iki işçi götürərək, Yevlax rayon sakinlərini salon xidmətləri ilə tanış etməyə başlayır. Kurslar zamanı əldə etdiyi sahibkarlıq bacarıqları sayəsində Günel yeni komandası ilə əhatə dairəsini genişləndirməyə və müştəri məmnuniyyətini artırmağa nail olur.
Günel bir gün Kəlbəcərə qayıtmaqla bağlı niyyətindən də söz açır: "Arzularımız reallığa çevrilib! Kəlbəcər yenə bizim vətənimizdir! Ailəmlə Kəlbəcərə qayıtdıqdan sonra orada salonumun daha böyük bir qolunu açmaq niyyətindəyəm. Bütün bu arzu və uğurlarımın səbəbkarı olan "Ümid” təşkilatına və əvəzsiz maliyyə dəstəyinə görə BMT-nin Qaçqın Agentliyinə sonsuz təşəkkürümü bildirirəm. Onların dəstəyi arzumu reallaşdırmağa kömək etdi və mənim üçün yeni bir dünyaya qapı açdı”.
Mənbə:
https://azerbaijan.un.org/az/256867-g%C3%BCnel-qad%C4%B1n-sa%C3%A7-ustas%C4%B1-kimi-yeni-h%C9%99yata-ba%C5%9Flay%C4%B1r
