29
noyabr 2022-ci il tarixində Azərbaycan Respublikasının Qeyri-Hökumət Təşkilatlarına
Dövlət Dəstəyi Agentliyinin maliyyə dəstəyi ilə "Ümid” Sosial İnkişafa Dəstək
İctimai Birliyi tərəfindən icra edilən "Təhsildə idarəetmənin ictimailəşdirilməsinə
dəstək təşəbbüsü” layihəsi çərçivəsində "İcma-məktəb münasibətlərinin mövcud vəziyyətinin
öyrənilməsi məqsədilə keçirilmiş sorğu nəticələrinin təqdimatı” mövzusunda dəyirmi
masa keçirilmişdir. Dəyirmi masada "Ümid” SİD İB-nin rəhbərliyi, Elm və Təhsil
Nazirliyi yanında İctimai Şuranın sədri, Bakı şəhərində fəaliyyət göstərən bir
neçə orta məktəbin direktorları, ADPU-nun nəzdində Azərbaycan Dövlət Pedaqoji
Kollecinin əməkdaşları, təhsil sahəsi üzrə fəaliyyət göstərən QHT rəhbərləri, təhsil
ekspertləri, Azərbaycan Respublikası Təhsil İnstitutunun və Bakı Təhsil İdarəsinin
əməkdaşları iştirak etmişlər.
"Ümid”
SİD İB-nin İcraçı direktoru İsrayıl İsgəndərov giriş sözü ilə tədbiri açaraq icra
edilən layihə barədə və layihə çərçivəsində Suraxanı rayonu Hövsan icmasında
280 saylı tam orta məktəb və Xəzər rayonu Türkan icmasında 262 saylı tam orta məktəblərdə
məktəb-icma münasibətlərinin araşdırılması prosesi barədə məlumat verib.
Elm
və Təhsil Nazirliyi yanında İctimai Şuranın sədri Günel Səfərova çıxışında Təhsil
Nazirliyinin məktəb-icma münasibətlərinin araşdırılması və məktəb-icma əməkdaşlığı
modelinin tətbiqi istiqamətindəki məqsədyönlü fəaliyyətləri barədə məlumat
verib. O, bildirib ki, icmanın məktəbin təhsil prosesində yaxından iştirak etməsi
məktəb-icma münasibətlərinin yaxşılaşmasına və məktəb nüfuzunun artırılmasına
böyük töhfə verəcəkdir.
Tədbirdə
"Ümid” Sosial İnkişafa Dəstək İctimai Birliyi tərəfindən Bakı şəhəri Suraxanı
rayonu Hövsan və Xəzər rayonu Türkan icmalarında icma-məktəb münasibətlərinin
mövcud vəziyyətinin öyrənilməsi məqsədilə keçirilmiş sorğu nəticələrinin təqdimatı
keçirilib.
Tədbirin
davamında sorğu nəticələri ilə bağlı müzakirələr aparılmışdır. Çıxış edən Beynəlxalq
Avrasiya Mətbuat Fondunun prezidenti Umud Mirzəyev, təhsil eksperti Nadir
İsrafilov, "Təmiz Dünya” Qadınlara Yardım İctimai Birliyinin sədri Mehriban
Zeynalova, Azərbaycan Uşaqlar Birliyinin sədri Kəmalə Ağazadə və s.
iştirakçılar məktəb-icma münasibətlərinin yaxşılaşdırılması üçün zəruri tədbirlərin
həyata keçirilməsi, valideynlərin və icma üzvlərinin təhsil prosesində rolunun
artırılması barədə fikirlərini bildirmişlər.
Tədbirin sonunda icma-məktəb münasibətlərinin yaxşılaşdırılması və icma üzvlərinin məktəbin təhsil prosesində fəal iştirakının təmin edilməsi istiqamətində təkliflər verilib.
